𝗠𝗔𝗡𝗗𝗨𝗥𝗥𝗜𝗔𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Patay ang isa ka Indian National matapos nga natiruhan sa Brgy. Guzman, Mandurriao, Iloilo City subong nga gab-i.
Ang biktima amo si Jatinder Singh, 27-anyos, naga-board sa nasambit nga barangay.
Sa interview sang Bombo Radyo kay Punong Barangay Roseller Paredes sang Brgy. Guzman, Mandurriao, iya ginpahayag nga posible manaog na kuntani ang biktima sa iya motor bangud nauyatan pa sini ang iya plastic nga dala samtang nagaandar ang motorsiklo.
Suno kay Paredes, sang may nabatian siya nga duha ka lupok, gilayon ini nga nagpadulong sa lugar, sa diin, naabtan niya nga nagakaya na ang Indian National kag pilason.
Ginpahayag man sini nga igo sa parte sang lawas ang naagum sang biktima kag gilayon nga gindala sang kapulisan sa ospital.
Sa subong, padayon pa nga ginaimbestigaran sang Mandurriao Police Station ang natabo nga insidente agud matumod ang motibo sa likod sang pagpangluthang.
