ILOILO CITY- Nagsugtanay ang Pilipinas kag China sa pagpahagan-hagan kag pagpakalma sang tensyon sa West Philippine Sea sa tunga sang mainit nga mga komprontasyon sang magtimbang nga bahin.
Ini ang resulta sang ginpatigayon nga bilateral meeting nanday Department of Foreign Affairs Undersecretary Ma. Theresa Lazaro kag Chinese Vice Foreign Minister Chen Xiaodong.
Ikaduha na ini nga pagsinapol sang duha ka Partido humalin sang Enero 17 kun sa diin gindiskusyunan sang duha ka pungsod ang sitwasyon sa West Philippine Sea kalakip na ang insidente sang Hunyo 17 kun sa diin ginbungguan sang Chinese Coast Guard vessels ang Philippine vessels, ginpangkuha ang mga armas kag ginpangbuslutan ang rubber boats, kag ginpahog ang mga Filipino nga suldado nga maga-deliver sang food supplies, firearms kag iban nga kagamitan sa Filipino troops sa Second Thomas Shoal.
Sa amo nga hitabo, nautdan pa sang tudlo ang isa ka Philippine Navy personnel.
Ini ang ginkabig pinakabayolente nga nangin hulag sang China batok sa Pilipinas nga nagresulta sang pagkondenar kag pagkaalarma sang iban nga pungsod kag isa na diri ang kaalyado sang Pilipinas nga Estados Unidos sang America.
Suno sa Department of Foreign Affairs, nangin prangka kag constructive ang pag-istoryahanay nanday Lazaro kag Xiaodong.
Pareho man nga ginkilala sang duha ka bahin ang importansya sang liwat nga pagbuhi sang pagsalig kag produktibo nga dayalogo nahanungod sa sitwasyon sa West Philippine Sea.
