ILOILO CITY- Kabahin ang isa ka Ilonggo sa magahampang para sa Philippine team sa patigayunon nga pinakadako nga university basketball event sa Asya subong nga 2024.
Pito ka mga pungsod ang maga-compete sa event nga patigayunon sa grand Kaohsiung Dome sa Taiwan.
Ang BLIA Cup sa idalom sang Fo Guang Cup Basketball Invitation ang natalana sa Hulyo 23 tubtob 28.
Ang Philippine Team ang ginatiglawas sang Guang Ming College of Tagaytay sa idalom sang University of the Philippines (UP) Fighting Maroons OSD Coach Bo Perasol kag Coach Paul Ramos.
Ang nagakompleto sang Philippine Team amo ang Ilonggo nga si Kent John Parren̈as sang Pototan, ang nagaisahanon nga Ilonggo varsity player sang Guang Ming College.
Magluwas sa Pilipinas, kabahin man sang tournament ang Malaysia, Taiwan, New Zealand, Australia, United States kag Japan.
