Patay ang tatlo ka mga menor-de-edad nga mag-utod matapos nga na-trap sa ila balay nga nasunog sa Barangay Dalusan, Maasin, Iloilo.
Ang mga biktima ang nagaedad sang lima ka tuig; apat ka tuig; kag isa ka tuig. Ang mga naga-edad nga lima kag apat ka tuig ang lunsay pa Persons with Disability ukon indi makalakat bangud sa ginapahayag nga polio.
Magluwas sa mga napatay, nasamaran man duha nila ka utod nga naga-edad sang 12 ka tuig kag walo ka tuig.
Sa interview sang Bombo Radyo kay Fire Officer 2 Remegio Peloquero, Jr., fire arson investigator sang Bureau of Fire Protection-Maasin, iya ginpahayag nga natabo ang insidente pasado ‘las dies kagab-i.
Sang amo nga tion, ginapahayag nga yara ang lima ka kabataan sa sulod sang balay samtang namilasyon naman sa namatyan ang iloy kag ang amay nga sanday Michelle kag Arnel Decir nga ginapahayag 200 metros ang kalayuon halin sa ila balay.
Ginapatihan nga ang dabok sa idalom sang hagdan ang ginhalinan sang kalayo. Padayon pa ang imbestigasyon sang otoridad kag ginahibalo pa ang update sa kondisyon sang duha ka iban pa nga nasamaran.#
