Nagaginhawa pa kuntani ang agot nga bata sang pamilya Decir sang gindala ini sa ospital pagkatapos nga nasunog ang ila balay sa Barangay Dalusan, Maasin, Iloilo kagab-i, Hulyo 3.
Ini ang sandig sa panaysayon ni May Melchor nga tiya sang mga biktima kag isa man sa gilayon nga nagkadto sa area sang nabalitaan sini ang natabo nga insidente.
Ang agot nga bata ang nagaedad sang isa ka tuig kag apat ka bulan.
Sa interview sang Bombo Radyo kay Melchor, iya ginpahayag nga nagbulig siya nga mahakwat ang bata kag madalagan sa ospital sa banwa sang Janiuay.
“Daw indi ako kaginhawa,” suno kay Melchor. “Puerte ang kulba ko. Waay ko kamaan ka aragyan nga madulom. Matyag ko daw nagalupad ako sa pagdalagan-padulhog. Gasinggit ako sa motor nga saparon dara ang bata sa ospital.”
Suno kay Melchor, sang tion nga ginakungkong sini ang bata, nagaginhawa pa ini kag gin-pump na sang nakaabot sa ospital. Halos isa ka oras pa nga buhi ang bata suno sa natungdan apang sang ulihi, sang gin-check ini sang iloy, mayami na ini kag mabaskog.
Nagahilibion nga ginlaragway ni Melchor nga bisan makit-an pa man ang nawong sang bata pagkatapos sang insidente, halos daw litson na ang itsura sini kag sunog pati ang kinatawo.
“Daha gid (lawas ya). Daw pareho ka ayam nga daw litson bala,” paglaragway sini. “Ang gawi na gahabok… Pati ang kinatawo na, nasunog man.”
Nahibaluan nga magluwas sa isa ka tuig nga bata, nasunog man kag napatay ang mga magulang sini nga naga-edad sang lima kag apat ka tuig nga lunsay Persons with Disability (PWD). May mga samad man kag paso ang iban pa sini nga magulang nga naga-edad sang 12 kag walo ka tuig.
Sang tion nga natabo ang sunog, wala sa balay ang mga ginikanan bangud namilasyon sa namatyan nga ginabanta 200 metros ang kalayuon halin sa ila balay.
Ginapatihan nga ang dabok sa idalom sang hagdan ang ginhalinan sang kalayo. Wala man gilayon napalong ang kalayo bangud malayo pa ang bubon nga sarang makuhaan sang tubig.#
