Insigida nga naghatag sang bulig ang local government unit (LGU) matapos ang natabo nga trahedya sa isa ka pamilya sa Barangay Dalusan, Maasin, Iloilo kun sa diin tatlo gid sa kabataan nga mag-ulutod ang ginbawian sang kabuhi bangud sa sunog.
Sa interview sang Bombo Radyo kay Mayor Francis Amboy, iya ginpahayag nga libre ang lulubngan kag lubong sang tatlo ka bata kag may idugang man nga P100,000 nga burial assistance para sa tatlo ka mga biktima.
Suno sa alkalde, buligan man ang pamilya nga makapatindog liwat sang puluy-an bangud nga naubos gid lamon sang kalayo ang ila balay kagab-i.
Maga-hatag man sang iban pa nga assistance ang LGU kaangay sang stress debriefing.
Una na nga ginpahayag sang pulis nga santo sa ila joint investigation sang Bureau of Fire Protection, wala sang foul play kundi aksidente lamang ang sunog.
Ang napatay sa amo nga insidente amo ang isa ka tuig nga bata kag magulang sini nga naga-edad sang lima kag apat ka tuig nga lunsay Persons with Disability (PWD). May mga samad man kag paso ang iban pa sini nga magulang nga naga-edad sang 12 kag walo ka tuig kag subong nagapabilin sa ospital.
Sang tion nga natabo ang sunog, wala sa balay ang mga ginikanan bangud namilasyon sa namatyan nga ginabanta 200 metros ang kalayuon halin sa ila balay.
Ginapatihan nga ang dabok sa idalom sang hagdan ang ginhalinan sang kalayo. Wala man gilayon napalong ang kalayo bangud malayo pa ang bubon nga sarang makuhaan sang tubig.
Nahibaluan man nga indi miyembro sang 4Ps (Pantawid Pamilyang Pilipino Program) ang amo nga pamilya apang gin-athag sang LGU nga may endorsement halin sa local nga lebel nga dal-on ang pamilya sa amo nga programa apang wala nadala sa ginlista sang national government.#
