Ginkumpirma sang Bureau of Jail Management and Penology (BJMP) nga nag-apply para sa plea bargaining ang 17 ka Chinese nationals nga nadakpan anay sang gin-raid sang otoridad ang gina-alegar nga cybersex den sa Lawaan Village, Barangay Balantang, Jaro, Iloilo City sang nagligad nga tuig.
Sa interview sang Bombo Radyo kay Jail Chief Inspector Denver Beltran, warden sang BJMP sa Barangay Nanga, Pototan, Iloilo, iya ginpahayag nga ginahulat pa kun i-grant sang korte ang amo nga legal action.
Antes sini nga tikang, matandaan nga ang defense lawyer ang naka-file man sang motion nga nagahingyo kay Judge Victorino Oliveros Maniba, Jr. sang Regional Trial Court Branch 39 nga pahanugutan ang respondents nga makapyansa para sa ila temporaryo nga kahilwayan.
Ang ila ginapangatubang amo ang non-bailable case nga qualified trafficking in person; obscene publication and exhibition through information and communication; kag violation sang cybercrime law.
Kun balikan, Nobyembre 4, 2023 ginpatigayon ang police raid matapos nga nag-isyu si Judge Maniba sang search warrant sa lugar kun sa diin gina-alegar nga naga-operate ang respondents sang cybersex den.
Una na nga ginpahayag sang kapulisan nga lunsay na legal ang edad apang undocumented ini nga Chinese nationals kag ginapatihan nga facilitators para sa Filipino kag foreign clients sang cybersex operation. Sang tion nga ginpatigayon ang raid, ginapahayag nga anum ka bulan na sila nga naga-operate sa lugar.
Nobyembre 24, 2023 sila nga napasulod sa BJMP Nanga, Pototan apang tubtub subong wala pa sang dugang nga impormasyon kaangot sa ila identity magluwas sa commitment order nga nahatag sang korte.
