Wala gid sang tinimok-timok ang embahada sang China sa Pilipinas kaangot sa 17 ka Chinese nationals nga nadakpan anay sang gin-raid sang otoridad ang gina-alegar nga cybersex den sa Lawaan Village, Barangay Balantang, Jaro, Iloilo City sang nagligad nga tuig.
Sandig ini sa kumpirmasyon ni Jail Chief Inspector Denver Beltran, warden sang Bureau of Jail Management and Penology (BJMP) sa Barangay Nanga, Pototan, Iloilo.
Nobyembre 4, 2023 sang ginpatigayon ang police raid kag Nobyembre 24 naman sang ginsulod ang mga ini sa BJMP.
Sa interview sang Bombo Radyo kay Beltran, iya ginpahayag nga sandig sa ila pagsulundan, kun foreign nationals ang gina-commit sa ila, obligasyon sang BJMP nga mag-kontak sa embahada para nga mapahibalo sa ila ang status sang mga ginkasuhan.
Ginhimo ini sang BJMP paagi sa pagpadala sang sulat sa Chinese embassy sang Nobyembre mismo sang 2023. Magluwas diri, nagpakig-angot man ang talatapan paagi sa e-mail.
Apisar Hulyo 2024 na subong suno kay Beltran, wala sa gihapon sang sabat halin sa embahada.
Nahibaluan nga ini nga Chinese nationals ang nagapangatubang sang non-bailable case nga qualified trafficking in person; obscene publication and exhibition through information and communication; kag violation sang cybercrime law.
Una na nga ginpahayag sang kapulisan nga lunsay na legal ang edad apang undocumented ini nga mga persona kag ginapatihan nga facilitators para sa Filipino kag foreign clients sang cybersex operation. Sang tion nga ginpatigayon ang raid sa Jaro, Iloilo City, ginapahayag nga anum ka bulan na sila nga naga-operate sa lugar.
Sa latest nga update halin sa BJMP, ginpahayag nga nag-apply ang mga ini para sa plea bargaining kag ginahulat naman kun i-grant ini sang korte.
