Ginbalikan sang Bureau of Fire Protection (BFP) ang area sa Barangay Dalusan, Maasin, Iloilo agud matumod kun may yara sang flammable substance nga nangin rason sang sunog sang nagligad nga gab-i, Hulyo 3, nga ginkamatay sang tatlo ka mag-ulutod nga lunsay menor-de-edad.
Sa interview sang Bombo Radyo kay Senior Fire Officer 3 Lira Villafranca, acting municipal fire marshal sang Maasin Fire Station, iya ginpahayag nga kabahin ini sang pag-tul-id sang imbestigasyon apisar nga una na nga ginpahayag nga naghalin sa dabok ang kalayo nga naglamon sang bug-os nga balay.
Sa report sang fire authorities, nagdangat sa P22,750 ang estimated damage sa amo nga sunog.
Una na nga ginpahayag sang Maasin Municipal Police Station nga wala sang foul play sa sunog kundi aksidente gid lamang.
Sa amo nga insidente nga nagluntad pasado 10:00 sa gab-i sang Myerkules, magluwas nga napatay ang tatlo ka menor de edad kun sa diin duha pa ang Persons with Disability (PWD), duha pa sa ila mga utod ang nasamaran man kag gin-refer na sa Western Visayas Medical Center sa Iloilo City.
Nahibaluan man nga wala ang mga ginikanan sa ila balay sang amo nga tion bangud pareho ang mga ini nga namilasyon sa namatyan nga ginapahayag 200 metros ang distansya halin sa ila puluy-an.
