๐ ๐๐ก๐๐๐ โ Ginmanduan ni Presidente Ferdinand โBongbongโ Marcos Jr. ang Armed Forces of the Philippines (AFP) nga buhinan ang tensyon batok sa China sa West Philippine Sea.
Suno kay Armed Forces of the Philippines chief of staff General Romeo Brawner Jr, nagpalab-ot sang pagpasalamat si Marcos sa mga suldado nga Pilipino nga nag-akto sang restraint samtang yara sa idalom sang mando agud depensahan ang soberanya kag interes sang pungsod sa West Philippine Sea nga ginaangkon sang China sa pihak sang arbitral award pabor sa Pilipinas sang 2016.
Ginpahayag man sini nga mabudlay ang ginahimo sang mga suldado bangud samtang ginadepensahan ang pungsod, naga-practice sila sang restraint, ukon ginapunggan nila ang ila kaugalingon apisar nga luyag nila nga magpakig-away.
Matandaan nga sang Hunyo 17, nadulaan sang kumalagko ang isa ka Philippine Navy kag pila ang pilason matapos sulit-sulit nga ginbunggo sang Chinese Coast Guard (CCG) ang mga rubber boat sang Pilipinas agud punggan ang mga ini sa pagdul-ong sang suplay sang pagkaon, armas, kag iban pa nga mga kinahanglanon sa BRP Sierra Madre.
Kasunod sini, nagapangayo ang AFP sang P60 million nga danyos gikan sa China kasunod sang pagkaguba sang mga kagamitan kag sakayan sang Pilipinas sang Hunyo 17 nga insidente.
Nagsulat man si Brawner kay Defense Secretary Gilberto Teodoro Jr. agud ang iya sulat mapadala sa Department of Foreign Affairs (DFA), nga magalab-ot sa mga katupong sini sa China.
Ginhatagan niya man sang igtalupangod nga ang kantidad, ang wala nagasakop sa gasto sang mga pusil nga nakumpiskar sa ila sang mga Chinese personnel.
Suno kay Brawner, luyag man sang AFP nga baydan sang China ang gin-gasto sa reconstruction sang kamot sang Filipino Navy officer nga nadulaan sang tudlo bangud sa insidente.
Ginpaathag man sang hepe sang AFP nga sa masunod nga rotation kag resupply mission para sa mga tropa sa BRP Sierra Madre sa Ayungin Shoal, indi na nila pagtugutan ang Chinese personnel nga mag-bully liwat sa Filipino personnel.
Pila naman ka semana matapos ang insidente, ang mga opisyales sang Pilipinas kag China ang nagkit-anay sa Manila sa isa ka bilateral nga pagsinapol nga nagatuyo sa pag-de-escalate kag pagdumala sang indi pag-intindihanay sa West Philippine Sea.
Kaangot diri, nagpanawagan ang China sa Pilipinas nga untaton ang “maritime infringement” kag maghulag agud mag-establisar sang ila relasyon nga amligan ang teritoryo agud indi na madugangan ang pagkaguba sini.
