𝗞𝗜𝗡𝗚𝗦𝗧𝗢𝗡 — Ginlaslasan sang Hurricane Beryl ang Cayman Island kag Mexico, pagkatapos sini nga gin-igo ang Jamaica sang mabaskog nga hangin kag ulan, nga nagtuga sang baha kag pagkadula sang kuryente sa magagmay nga mga isla sang Caribbean.
Naglab-ot sa pulo ang napatay bangud sa category 4 nga hurricane matapos maagyan sini ang mga nasambit nga rehiyon, sa diin, tubtob subong, nagapabilin nga wala sang komunikasyon ang mga isla bangud man sa baha kag makamamatay nga hangin.
Suno sa Meteorological Service of Jamaica kag US National Hurricane Center (NHC), sang gab-i sang Miyerkules, ang mata sang bagyo ang yara sa 100 miles (161 km) nakatundan sang Kingston kag nagpadulong sa Cayman Islands. Samtang, Huwebes naman sang naguwa si Hurricane Beryl sa Jamaica.
Ginpahayag man sang US National Hurricane Center, nga si Beryl ang nagdala sang maximum sustained winds nga 130 milya kada oras (209 kph), nga may sarang magbubo sang 4-6 inches (10-15 cm) nga pag-ulan sa Cayman Islands.
Nagpaandam man ang talatapan sa mga residente sang nasidlangan nga baybayon sang peninsula sang Yucatan, Mexico nga magdoble halong bangud man sa pagtupa sang kapareho nga kabaskugon nga hangin kag ulan.
Nahibaluan nga ang eyewall ni Beryl ang naglibot sa nabagatnan nga baybayon sang Jamaica, kag naglaslas sa mga komunidad rason nga ang mga emergency groups gin-evacuate ang mga tawo gikan sa amo nga lugar ilabi na ang yara sa prone-areas.
Nagpaguwa naman si Prime Minister Andrew Holness sang curfew kasunod sang pagsirado sang mayor nga airport kag mga dalanon.
Nagapati naman ang US National Hurricane Center nga ang kahalitan nga ginhimo ni Beryl, amo ang resulta sang mas mainit nga Dagat Atlantiko, nga ginasambit man sang mga sientipiko subong nga isa ka tanda sang pagbag-o sang klima nga gintuga sang tawo nga nagresulta man sang tuman ka init nga panahon.
Nahibaluan nga ang hurricane Beryl, amo ang una nga bagyo sang 2024 Atlantic season kag ang pinakauna nga bagyo nga narekord sang amo nga ahensya.
Naga-ekspektar naman ang US National Oceanic and Atmospheric Administration (NOAA) sang mas madamo kag dalagku nga mga bagyo sa isa ka “tumalagsahon” nga panahon subong nga tuig.
