Wala nahadlok ang Philippine Coast Guard (PCG) kag indi sini pagbawion ang gin-deploy nga barko nga BRP Teresa Magbanua sa Escoda Shoal sa West Philippine Sea apisar nga gin-angkla man sang China Coast Guard (CCG) ang ila “Monster Ship” sa amo man nga teritoryo.
Suno kay PCG spokesperson for the West Philippine Sea Commodore Jay Tarriela, ang 165-metros nga barko sang China nga amo man ang pinakadaku nga Coast Guard ship sa bilog nga kalibutan ang nagsulod sa 200-nautical mile exclusive economic zone (EEZ) sang Pilipinas sang tinalikdan nga Hulyo 2.
Ginradyuhan ini sang Pilipinas ilabi na kun naga-deploy ini sang rigid-hull inflatable boats apang wala ini nagasapak kag nagsige lamang sa paglayag palapit sa nahamtangan man sang BRP Teresa Magbanua ukon PCG vessel 9701.
Nagapati si Tarriela nga hungod nga ginpadala ang Monster Ship ukon CCG 5901 agud nga mahadlukan ang mga personnel sang Pilipinas particular na ang yara sa BRP Teresa Magbanua.
Nahibaluan nga ini nga Chinese ship ang naglayag man malapit sa Ayungin Shoal kag Panganiban (Mischief) Reef antes gindagdag ang angkla nga 800 yards lamang ang distansya halin sa barko sang Pilipinas nga nagabantay sa Escoda Shoal.
Wala pa sang ginpaguwa nga komento ang Chinese embassy kag ang Chinese foreign ministry kaangot diri.
Ang BRP Teresa Magbanua nga amo ang pinakadaku nga barko sang Philippine Coast Guard ang napadala sa West Philippine Sea sang nagligad pa nga Abril 16 matapos ginsuspetsahan nga may reclamation nga ginahimo ang China sa Escoda Shoal bangud sa ila ginapangtambak nga mga korales.
