𝗜𝗟𝗢𝗜𝗟𝗢 𝗖𝗜𝗧𝗬 — Nagpa-Bombo ang isa ka motorista matapos nga ginapahayag ginsinggitan kag ginbuyayaw sang ang isa ka traffic enforcer sa Terminal Market sang Rizal Pala-pala II, Iloilo City Proper.
Sa interview sang Bombo Radyo kay Alyas Myra, tagreklamo, iya ginpahayag nga kuntani ginhambalan lang siya sang insakto kag wala ginbuyayaw bangud para sa iya, daw kaangay nga ginbastos siya.
Suno kay Alyas Myra, ginhambalan siya sang traffic enforcer nga indi kabalo magbasa bangud man sa nag-park siya sang iya electric-bike sa lugar nga ginadumilian nga mag-parking.
Ginkalain man sang buot sini ang paghambal sa iya nga “Gg” rason nga nagbalos man siya sang buyayaw sa enforcer.
Gin-ako naman sang tagreklamo nga nagsala siya sang iya gin-parkingan rason nga naakig ang traffic enforcer sa iya.
Nahibaluan nga nagpadulong sa opisina sang Iloilo City Traffic Management Unit (ICTMU) ang natungdan agud nga ireklamo ang pagpangbastos sang traffic enforcer sa iya.
Nagpasalig naman ang talatapan nga suspendihon ang amo nga enforcer apang sang liwat nga nagpadulong ang tagreklamo sa lugar kun sa diin nagluntad ang insidente, liwat nga nakita sang tagreklamo nga naga-duty.
Nagpanawagan naman ang tagreklamo sa Iloilo City Traffic Management Unit nga suspendihon ang enforcer bangud sa ginapahayag ginhimo sini nga pagpangbuyayaw.
Bukas naman ang Bombo Radyo Iloilo sa mangin sabat sang traffic enforcer kaangot sa amo nga issue.
