𝗠𝗔𝗡𝗗𝗨𝗥𝗥𝗜𝗔𝗢, 𝗜𝗟𝗢𝗜𝗟𝗢 𝗖𝗜𝗧𝗬 —Gintumod sang Mandurriao Police Station nga isa ka lalaki ang gunman nga nagtiro-patay sa isa ka Indian National sa Brgy. Guzman- Jesena, Mandurriao, Iloilo City.
Ang biktima amo si Jatinder Singh, 27-anyos, temporaryo nga nagapuyo sa nasambit nga lugar.
Sa interview sang Bombo Radyo kay Police Captain Val Cambel, hepe sang Mandurriao Police Station, iya ginpahayag nga nagaguwa sa imbestigasyon nga isa lamang ka indibiwal ang nagtiro sa biktima.
Suno kay Cambel, naka-standby na nga daan ang suspek sa lugar kag ginahulat ang Indian National antes sini nga giluthang.
Ginpahayag man sini nga sang nagtuyo na nga magpanaog ang biktima sa iya motorsiklo, didto kag nagpanaog man ang suspek sa iya man nga motorsiklo kag gintiro ang Indian National.
Nangin dako naman nga pagpanghangkat sa bahin sang otoridad ang indi klaro nga kuha sang mga closed-circuit television ukon CCTV sa palibot sang lugar bangud indi pa matul-id ang identity sang suspek.
Ginalantaw naman sang kapulisan ang motibo nga Negosyo kag pagkamaoy sang biktima ang rason sa likod sang kamatayon sang Indian National.
