𝗖𝗘𝗕𝗨 𝗖𝗜𝗧𝗬 — Nakitaan sang guba ang rubberized track oval sang Cebu City Sports Center isa ka adlaw antes opisyal nga magsugod ang Palarong Pambansa 2024.
Sa interview sang Bombo Radyo kay John Pages, Chairperson sang Cebu City Sports Commission, iya ginpahayag nga nagkoordinar na sila sa kontraktor agud nga mahimuan sang paagi kag ma-repair ang track oval.
Suno kay Pages, may kalabaon nga 400 meters ang track oval kag gamay lamang nga porsyon sini ang nakitaan sang guba.
Nagpasalig naman ini nga gilayon maresolba ang problema ilabi na nga gamiton ang track oval sa pahampang nga athletics sa Hulyo 11, 2024.
Ginakabig man sang natungdan nga isa ka minor problem ang naguba nga lane 1 kag 6 sang rubberized track oval.
Nahibaluan nga opisyal na nga masugod bwas nga adlaw, Hulyo 9, 2024, ang Palarong Pambansa 2024 sa Cebu City Sports Center.
