𝗜𝗟𝗢𝗜𝗟𝗢 𝗖𝗜𝗧𝗬 — Ginalantaw sang City Engineers Office nga naga-delay ang konstruksyon sang mga drainage sa area sang Lapaz, Lapuz, kag Iloilo City Proper bangud wala sang koordinasyon sa ila ang Iloilo City District Engineering Office.
Sa interview sang Bombo Radyo kay Joel Gerasmia, Chief of Staff sang City Engineers Office, iya ginpahayag nga indi man nila matandog ang proyekto nga drainage bangud wala sang pahanugot halin sa District Engineering Office.
Suno kay Gerasmia, bangud sa kulang nga koordinasyon sa mga proyekto, nagatuga ini sang huol sa mga residente sa syudad, kaangay na lamang sang pagbaha ilabi na subong nga tig-ululan.
Ginpaathag man sini nga madasig magsaka ang tubig-baha bangud wala naga-angot ang pila ka drainage sa main drainage system sang syudad, rason man nga kinahanglan nga i-konsulta sang District Engineering Office sa City Engineers Office ang ila mga proyekto.
Ginpahayag man sang natungdan nga una na nga ginmaduan ni Iloilo City Mayor Jerry Treñas ang District Engineering Office nga magkoordinar sa ila nga talatapan, apang tubtob subong, wala sa gihapon sang tikang nga ginahimo ang nasambit nga opisina.
