Nagsaka na sa 36 ka mga sibilyan ang napatay bangud sa pagpaulan sang Russia sang missiles sa Ukraine sa tungang-adlaw kahapon nga amo ang ginakabig nga pinakamakamamatay nga atake sang Moscow sa sulod na sang pila na ka bulan.
Ginproklamar man sang gobyerno sang Ukraine ang day of mourning subong nga Martes.
Suno sa Ukrainian air force, napunggan man sang air defences ang 30 sa 38 ka missiles apang daku gihapon ang halit lakip ang lima ka civilian buildings, residential houses, business center kag duha ka medical facilities sa Kyiv, central cities sang Kryvyi Rih kag Dnipro kag duha ka eastern cities.
22 sa mga patay ang yara sa Kyiv samtang 82 naman ang napilasan.
11 ang napatay sa Dnipropetrovsk region kag 64 ang pilason; samtang tatlo naman sa casualties ang yara sa eastern town sang Pokrovsk kun sa diin gin-target sang missiles ang industrial facility.
Nagpasalig si Ukrainian President Volodymyr Zelenskiy nga magatimalos sila kag nagpanawagan man ini sa ila Western allies nga magbalos man kasunod sang amo nga atake.
Subong nga adlaw natalana man nga mag-convene ang United Nations Security Council kasunod sang request sang Britain, France, Ecuador, Slovenia, kag United States.
Nagpaguwa naman sang statement ang Russian Defence Ministry nga defence industry targets kag aviation bases sa Ukraine ang ila target. Sulit-sulit nga ginpanginwala sang Moscow nga gina-target sini ang mga sibilyan kag civilian infrastructure apisar nga maathag nga linibo na ka civilians ang napatay halin sang invasion nga natabo sang Pebrero 2022.
Ini nga atake sang Russia ang natabo antes ang tatlo ka adlaw nga summit sang NATO kun sa diin isa si Zelenskiy sa magatambong.
