Nagaguwa sa inisyal nga report sang Iloilo City Police Station 9 nga 11 gid ka stab wounds ang naangkon sang foreman nga ginpatay sa sulod sang barracks sa Barangay Benedicto, Jaro, Iloilo City.
Ang biktima nga foreman sa gina-construct nga multipurpose building sa barangay amo si Froilan Bernas, 63, residente sang Brgy. Sooc, Arevalo.
Sa interview sang Bombo Radyo kay Patrolman Venjie Nebit, imbestigador sang Iloilo City Police Station 9, iya ginpahayag nga ini nga mga pilas ang nakit-an sa kilid, liog, kag dughan sang biktima.
Gin-athag sini nga ini pending pa sa imbestigasyon sang Scene of the Crime Operation (SOCO) team kag resulta nga ipaguwa sang Philippine National Police (PNP) crime laboratory.
Ginatumod pa sang mga pulis kun sin-o posible ang persons of interest ilabi na bangud nagaguwa nga posible pagpangawat ang motibo sa krimen.
Sa inisyal nga imbestigasyon, wala na ang cellphone kag kwarta sang biktima nga ginapahayag nga nagalab-ot sa P20,000.
Gina-imbestigaran man kun makabig nga inside job ang insidente bangud posible nakahibalo ang suspek nga nagaisahanon ang biktima sa iya kwarto kag posible nga nangin tsansa ini agud nga makapangawat.
