𝗜𝗟𝗢𝗜𝗟𝗢 𝗖𝗜𝗧𝗬 — Nagpanindugan si Iloilo City Councilor Sedfrey Cabaluna nga wala ini sang may ginaprotektahan nga tawo ukon sin-o man sa ginpatigayon nga Committee Hearing of the Whole kahapon nga adlaw.
Ini kasunod man sa pag-utod sang topiko nga ginpamangkot ni Iloilo City Councilor Ely Estante, Jr. kaangot sa 17 ka mga Undocumented Chinese Nationals.
Sa interview sang Bombo Radyo kay Councilor Cabaluna, iya ginpahayag nga yara sa public interest ang iya nga tinutuyo kag ginhimo lamang niya ang amo nga akto bangud ini ang naga-santo sa layi.
Suno kay Cabaluna, tuyo lamang sini nga ipahanumdom sa konseho ang nahanungod sa sub judice rule rason nga nag-raise ini sang point of order nga nagapahibalo nga may mga ‘risks’ sa amo nga diskusyon kag kon indi pagsundon, posible nga ma-terminate ang kaso batok sa mga Undocumented Chinese Nationals.
Ginpahayag man sini nga kon hatagan siya liwat sang kahigayonan nga balikan ang oras, amo sa gihapon sini ang iya himuon apang sa amo na nga tion, mas temprano na niya ini nga hambalon, agud indi na maimpluwensyahan kaangay sa natabo sa ila ni Councilor Estante.
Una na nga gin-athag ni Cabaluna nga kabahin sang sub judice rule ang pagdumili nga magkomentar ukon mag-disclose sang mga detalye kaangot sa pending nga mga kaso sa korte.
Nagpanindugan naman si Councilor Estante nga ang iya pamangkot tuhoy sa kun sin-o ang tag-iya sang balay nga ginrentahan sang 17 ka mga Undocumented Chinese Nationals ang isa lamang ka “fact” ukon kamatuoran.
