ILOILO CITY- Nagsabat na ang Ilonggo singer nga si Jed Madela sa akusasyon sang iya anay manager kag tiya nga ‘ungrateful’ ini.
Kasunod ini sang post sang former manager ni Jed nga si Annie Mercado nga iya man lang tiya, nga ang bag-o sini nga kanta nga “Wish U The Worst” ang kaangay nga nagapakita kun ano nga sahi sang tawo si Jed bangud puno sang ini sang negativity, hate, kag bitterness.
Suno pa kay Mercado, may double meaning ang kanta kag ginhungod ini ni Jed agud garit-gariton kag paakigon siya.
Gintawag pa sini si Jed nga nagapakuno-kuno nga biktima nga sa pagkamatuod, ang singer ang may sala suno pa kay Mercado.
Sabat naman ni Jed, ang konplikto sa ila sang iya tiya ang isa ka family matter kag pribado nila ini nga hitsuhon.
Ginpahayag man ni Jed nga indi siya ang nagsulat sang kanta kag ginpakanta lamang ini sa iya.
Sa pihak sini, ginsiling sang Ilonggo singer nga dako gihapon ang iya pagpasalamat sa anay manager kag wala nagbag-o ang iya nabatyagan para kay Mercado.
