Wala sang na-monitor ang punong barangay sang Hibao-an Sur, Mandurriao, Iloilo City nga may bag-o kag makaduluda nga Chinese nationals sa Monterosa Subdivision sa amo nga distrito.
Sa interview sang Bombo Radyo kay Punong Barangay Rodlen Gallenero, iya ginpahayag nga sandig man ini sa iya koordinasyon sa presidente sang homeowners association nga nag-check man sa security personnel sang subdivision.
Base sa pagkahibalo sang punong barangay, duha lang ka Chinese nationals ang yara sa Monterosa kag madugay na ini nga nagapuyo sa amo nga lugar kag naga-negosyo lamang.
Indi man maplastar sang opisyal kun ano gid ang negosyo sang amo nga mga indibidwal apang posible suno sa natungdan nga engaged sa trucking services kag “mga opisina.”
Apang gin-athag sang opisyal nga wala niya nahibaluan kun may yara sang Chinese sa iban nga parte sang Monterosa subdivision bangud ini nga lugar ang indi lamang sakop sang Hibao-an Sur kundi sakop man sang Barangay Hibao-an Norte kag Calajunan.
Pananglitan suno kay Gallenero nga may iligal nga aktibidad ang Chinese nationals sa sulod sang subdivision, ma-monitor gid ini gilayon bangud yara lang sa guwa ang balay sang isa nila ka barangay kagawad kag mga barangay tanod man ang pila ka myembro sang traysikad association sa amo nga lugar.
Nahibaluan nga ini nga subdivision ang namensyonar sa sulat ni Iloilo City Lone District Rep. Julienne ‘Jamjam’ Baronda sa Department of Justice nga gina-alegar ginatiniran sang madamo nga Chinese nationals.
Sa sulat sang kongresista, ginhingyo sini ang imbestigasyon sang National Bureau of Investigation kag Bureau of Immigration bangud sa ginapahayag makaduluda nga pagtinir sa syudad sang mga tawo halin sa mainland China, indi halos makahambal sang English, nakabakal sang mga balay sa balor nga P30-million tubtub P50-million, kag may yara man sang luxury nga sports utility vehicles (SUVs).
Namensyonar man sa amo nga sulat ang Puerto Real de Iloilo kag Ledesco Subdivision sa La Paz.
