𝗚𝗔𝗭𝗔 —Ginpakamalaut sang mga Foreign Ministers gikan sa Group of Seven (G7) ang tikang sang Israel sa pagpasangkad sang ila mga puluy-an sa ginasakop nga West Bank kag nagpanidugan nga ini nga tikang ang counterproductive sa kawsa sang kalinong.
Gin-anunsyo sang Israel sang nagligad nga bulan nga “i-legalize” sini ang lima ka outpost sa West Bank, magtukod sang tatlo ka bag-o nga mga puluy-an, kag mag-agaw sang dalagku nga mga duta, kon sa diin, ang mga Palestinian nagatinguha sa paghimo sang isa ka independiente nga estado.
Nahibaluan nga G7—nga nagalakip sang Estados Unidos, Britanya, Canada, Japan, France, Germany kag Italy— nga nagakondenar sang tikang kag naghingyo sa Israel nga baliskaron ang ila desisyon.
Ginpahayag man sang G7 nga ginapamatud-an lang liwat nila ang ila nangin promisa nga padayunon nga paghidait sa basehan sang solusyon sang duha ka Estado.
Luwas sa G7, nagpanawagan man ang mga foreign ministers nga ipaguwa ang tanan nga nabilin nga ginpunggan nga kita sa buwis sa Palestinian Authority, kag nagpahayag ang pagmentinar sang kalig-on sa ekonomiya sa West Bank ang kritikal para sa seguridad sa rehiyon.
