𝗠𝗔𝗡𝗜𝗟𝗔 — Nag-veto ukon gin-reject ni Presidente Ferdinand Marcos Jr. ang ginaproponer nga Philippine National Police (PNP) Organizational Reforms Act.
Suno kay Executive Secretary Lucas Bersamin, ang tikang sang presidente amo ang masiguro nga ang bisan ano nga mga pagbag-o sa pwersa sang pulis may kinamatarong, hayag, kag matuod nga mapuslanon.
Ginpahayag man ni Bersamin nga ang ginaproponer nga kasuguan nagatinguha sa pagpatuman sang mga pagbag-o sa sweldo sang mga pulis nga mahimo makatuga sang “indi patas nga mga pagkatuhay” sa tunga sang mga opisyales.
Gin-athag man sini nga nagapati ang Presidente nga kinahanglanon nga ipabilin ang kinamatarong kag patas sa sweldo para sa tanan nga katapo sang Philippine National Police.
Ang hagna nagahimo man sang bag-o nga mga opisina sa sulod sang PNP, nga suno sa iya, mahimo magdul-ong sa indi kinahanglanon nga burukrasya kag inefficiency.
Dugang pa sang natungdan nga ang katuyuan sang administrasyon amo ang i-organisar ang mga operasyon kag indi ang pagpakomplikado sa ila.
Ginlaragway man ni Bersamin nga ang pagdugang sang mga opisina ang mahimo nga maghatag sang mga risgo sa seguridad, kon sa diin, para sa iya, importante nga ang Internal Affairs Service (IAS), ang mangin responsable sa pag-imbestigar sang indi maayo nga pagginawi sang mga pulis, nagapabilin nga independiente kag wala sing ginadampigan.
Nagapati man ini nga ang ginaduso nga mga pagbag-o ang mahimo nga magkompromiso sang kahilwayan.
Ginpatpat man sini nga ang pila ka bahin sang hagna ang indi maathag, ilabi na ang nahanungod sa retroactive nga mga benepisyo para sa mga opisyales.
Nagpasalig man ini nga ang Presidente kag ang administrasyon ang malig-on sa pangako sa pagsuporta sa PNP kag pagsiguro nga ang anuman nga mga reporma, ang pareho nga patas kag epektibo.
Nahibaluan nga ang gin-veto nga tikang isa ka consolidated version sang Senate Bill 2449 kag House Bill 8327, kon sa diin, ang mga nagapanguna nga tagsulat sini amo sanday Sen. Ramon Revilla kag House Speaker Martin Romualdez nga pakaisa sang Presidente.
