𝗜𝗟𝗢𝗜𝗟𝗢 𝗖𝗜𝗧𝗬 — Pilason ang duha ka mga indibidwal matapos nga nabungguan sang taxi sa JM Basa Street, Iloilo City Proper.
Ang mga biktima amo sanday Imelda Jalbuena kag Salve Labrador, lunsay nagatrabaho sa Iloilo City Hall.
Sa interview sang Bombo Radyo kay Police Executive Master Sergeant Julius Uy, traffic investigator, iya ginpahayag nga naghalin ang duha ka mga biktima sa city hall kag matabok kuntani padulong sa isa ka convenient store.
Suno kay Uy, wala natalupangdan sang taxi ang duha bangud naka-focus ini sa piyak nga lane sang karsada rason nga nabungguan sini.
Ginpahayag man sini nga nagtabok sa pedestrian lane ang mga biktima apang nalab-ot gid sang taxi.
Nag-agom naman ang duha ka biktima sang pilas sa siko, kamot, tiil kag bukol sa ulo nga gilayon man gindapatan sang nagakaigo nga pagbulong.
