Nag-angkon sang mga paso ukon first degree burn ang anum ka mga kabataan bangud sa pag-ibwal sang bonfire sa ginpatigayon nga Diocesan Youth Camp 2024 sa Barangay Capiñahan, Lemery, Iloilo.
Sandig sa ginpaguwa nga official statement sang Diocesan Youth Executive Council, natabo ini kadungan sang isa ka programa para sa Agape Meal nga nagsugod 7:30 sang gab-i sang Hulyo 5.
Gilayon nga ginhatagan sang medical teams kag volunteers sang medical attention ang mga biktima. Sa anum nga na-involve sa insidente, apat ang gindala sa ospital para mahatagan sang nagakaigu nga pagbulong.
Gina-ako sang council ang responsibilidad sa amo nga hitabo kag nagpasalig sang bulig kag suporta sa mga nasamaran sa amo nga insidente.
Nagpangayo man ini sang pasaylo sa kakugmat nga natuga sang amo nga hitabo kag ginklaro man nga nagapakig-angot na ini sa mga pamilya sang mga biktima agud nga mahibaluan ang ila kahimtangan kag mahatag kun ano pa ang sarang mabulig sa ila.
Nahibaluan nga ini na ang ika-42 nga edisyon sang Diocesan Youth Camp sang Diyosesis sang Iloilo. Sa sini nga event nga nagsugod Hunyo 30 kag naglawig tubtub Hulyo 6, yara sa 710 ka mga pamatan-on gikan sa 23 ka mga parokya kag mission chapels sa bug-os nga Iloilo ang nagtambong.
(Photo: YIFI Lemery/FB)
