Nagapabilin nga Quinto Distrito ang pinaka-paborito nga kadtuan sang mga turista nga nagabisita sa probinsya sang Iloilo.
Sandig sa data sang Iloilo Provincial Tourism Office sang 2023, nagapanguna ang fifth district kaangay man sa naglinigad nga mga tinuig kun sa diin 39-40 porsyento gid sang tourist traffic sa bilog nga probinsya.
Sa interview sang Bombo Radyo kay Provincial Tourism Officer Gilbert ‘Bombet’ Marin, iya ginpahayag nga ginalantaw nga rason diri amo ang island destinations kag mainland attractions nga rason kun ngaa madamo ang naga-overnight sa amo nga distrito nga ginabug-usan sang Ajuy, Balasan, Barotac Viejo, Batad, Carles, Concepcion, Estancia, Lemery, San Dionisio, San Rafael kag Sara.
Nagapangaduha sa pinakadamo nga turista amo ang 1st district kun sa diin madamo ang heritage destinations; pangatlo ang 4th district kun sa diin ginalantaw nga factor ang 18th National Scout Jamboree sa syudad sang Passi sang Disyembre; ginasundan sang 3rd district kun sa diin ginabalik-balikan ang eco-agri destinations; kag ulihi ang 2nd district kun sa diin ginapabugal ang eco-culture.
Pahayag ni Marin, sa tourist arrivals sang 2023, 98% gid ang domestic tourists kag halos dos porsyento lamang ang foreigners.
Nahibaluan nga sa latest report sang tourism department sa Western Visayas, yara sa P70-billion ang natipon sa 5.36-million nga tourist arrivals sa rehiyon sang 2023 kun sa diin nagapanguna diri ang Aklan nga puluy-an sang Boracay Island. May yara ini sang 2.2 million arrivals kag masobra P44.43 billion kun pagahambalan naman sang receipts.
Naka-record naman ang Iloilo province sang 318,535 arrivals kag nakatipon sang P2.269 billion.
(Photo: Travel with Expedia Philippines)
