ILOILO CITY- Natalana nga mag-atubangay ang pamilya sang lalaki nga napatay sa aksidente kag ang tag-iya sang trailer truck nga nabungguan sang iya motorsiklo sa Brgy. Loboc, Lapuz, Iloilo City nga rason sang iya kamatayon.
Ang biktima amo si Jessmark Gabral, 23-anyos, kag residente sang Brgy. Mansaya, Lapuz, Iloilo City.
Sa interview sang Bombo Radyo kay Police Corporal Oliver Diaz, Traffic Investigator sang La Paz Police Station, iya ginpahayag nga ginatun-an nila subong ang posibilidad nga may salabton ang driver sang trailer truck nga nag-park sa higad sang dalan.
Nahibaluan nga nagdul-ong lang ang biktima sa iya nga mga abyan gamit ang motorsiklo kag magapauli na kuntani sang nakabunggo sa trailer truck.
Una na nga nagsulat ang Iloilo City Traffic Management Unit (ICTMU) sa mga operators sang trailer truck nga ginadumilian ang pag-park sa lugar, apang, makaligad lamang ang duha ka bulan, liwat na naman nga nagbalik sa pag-park ang ang mga truck.
