𝗜𝗟𝗢𝗜𝗟𝗢 𝗖𝗜𝗧𝗬 — Magakoordinar ang Anti-squatting and Illegal Structures Unit (ASIS-U) sa Iloilo City Traffic Management Unit (ICTMU) agud nga matigayon nga makuha ang mga trailer truck sa Brgy. Loboc, Lapuz, Iloilo City.
Sa interview sang Bombo Radyo kay Lovejoy Hosenilla, head sang Anti-squatting and Illegal Structures Unit, iya ginpahayag nga istoryahan anay nila ni Ret. Police Colonel Uldarico Garbanzos kon sa diin nila ibutang ang mga trailer truck nga makuha sa lugar.
Suno kay Hosenilla, indi masarangan sang ila talatapan nga makuha ang truck bangud sa kadakuon sini.
Gin-athag man sang natungdan nga sa subong, four wheels lamang ang masarangan sang ila nga talatapan nga makuha.
Nagpasalig naman ini nga pangitaan sang paagi agud nga makuha ang mga trailer truck nga iligal nga naga-park agud nga indi na pagtunaan sang aksidente.
Sa subong, ginahulat na lang sang ila nga talatapan ang mangin desisyon sang Iloilo City Traffic Management Unit antes nga magpatuman sang ila masunod nga tikang.
Nahibaluan nga una na nga nagsulat ang Iloilo City Traffic Management Unit (ICTMU) sa mga operators sang trailer truck agud nga dumilian ang pag-park sa lugar, apang, makaligad lamang ang duha ka bulan, liwat na naman nga nagbalik parking ang mga truck.
