Ginalauman nga pangunahan ni Vice President kag outgoing Department of Education (DepEd) Secretary Sara Duterte ang closing ceremonies sang Palarong Pambansa 2024 sa Cebu City Sports Center karon sa hapon.
Ini matapos wala nagpakita ang bise-presidente sang opening ceremony kag ang nagkadto amo mismo si President Ferdinand Marcos, Jr.
Apisar wala pa sang direkta nga kumpirmasyon nga maga-abot si Sara, pila ka adlaw na nga naga-conduct sang inspeksyon sa sports center ang security kag protocol team ni Duterte nga ginalantaw nga indikasyon nga magatambong ini sa kahiwatan.
Lakip man sa ginalauman nga magatambong amo si Senator Imee Marcos kag ang iya bata nga lalaki nga si Ilocos Norte Governor Matthew Manotoc.
Nahibaluan nga ang Ilocos Norte amo ang maga-host sang 2025 Palarong Pambansa, partikular ang Laoag City, rason man nga yara na si Manotoc sa Cebu halin kahapon, Hulyo 15, agud nga mag-obserbar sa sports center, iban nga playing venues, kag billeting areas.
Sa opisyal nga pagtakop sang Palarong Pambansa karon sa hapon, igapadayaw sang provincial government ang “Pasigarbo sa Sugbo” kag ang innovative show of lights nga amo ang maga-highlight sa event. Ini nga Pasigarbo ang maga-feature sang masobra 20 festivals para ipakita ang mga ginapabugal sang Cebu.
Pananglitan magtambong si VP Sara, ini ang pinakadaku nga event sang DepEd nga iya makadtuan antes dalayon manaog sa pwesto bilang tiglikom sang ahensya bangud mangin epektibo na sa Hulyo 19 ang iya resignation kag natalana siya nga buslan ni Senator Sonny Angara.
