CALINOG, ILOILO – Ginpangunahan ni President Ferdinand ‘Bongbong’ Marcos Jr. ang inagurasyon sang mega dam nga Jalaur River Multi-Purpose Project sa Calinog, Iloilo.
Ang first phase sang proyekto ang gin-umpisahan sang National Irrigation Administration sang 1980’s sa tion ni late President Ferdinand Marcos Sr. apang naatrasar bangud sa kakulang sang pondo.
Ang second phase ang ginpadayon sang 2011 sa tion ni late President Benigno Aquino III.
Gindugangan naman ni President Bongbong ang pondo sang P8 billion agud makumpleto ang proyekto.
Sa iya speech, ginpahayag sang presidente nga ang proyekto ang magabulig sa problema sa dako nga gasto sang mga mangunguma agud masupalayan sang tubig ang mga humayan.
Ginalauman nga matubigan ang masobra 31,000 ka ektaraya sang humayan sa diin makapulos ang halos 25,000 nga mga mangunguma sa tion nga mangin fully operational na ang dam sa 2025.
Ang P19.70 billion project ang may yara sang tatlo ka major components nga ginalakipan sang, irrigation development; environmental kag watershed management; kag institutional development.
Ini ang ginabug-usan sang 109-meter high dam, 38.5-meter afterbay dam kag 80.74 kilometer high line canal nga makahatag sang benepisyo kaangay sang irrigation, bulk water supply, hydroelectric power, inland fishery kag eco-tourism.
Gindugang man sang presidente nga ang Jalaur River Multi-Purpose Project ang isa lang sa 194 nga mga priority infrastructure projects sang administrasyon sa idalom sang “Build Better More” (BBM) program agud mapapag-on pa ang sektor sang agrikultura nga tuman nga naapektuhan sang mga kalamidad kag mangin sang El Niño phenomenon.
