ILOILO CITY- Pataason pa sang Pilipinas kag China sa presidential office kag top diplomats ang lebel sang mga opisyal nga mahimo nga magtawag sa isa kag isa paagi sa emergency mechanism sa tion nga may magluntad nga insidente sa West Philippine Sea.
Ang bag-o nga kasugtanan nga ginatawag nga “Arrangement on Improving Philippines-China Maritime Communication Mechanisms” ang napirmahan sa isa ka crucial bilateral consultation meeting nga gin- host sang Pilipinas sang Hulyo 2 sa tunga sang mainit nga tensyon sa amo nga teritoryo sang Pilipinas.
Ginpahayag sang Department of Foreign Affairs pagkatapos sang sugilanon nga pareho nga nagpasugot ang magtimbang nga bahin nga diskusyunan dugang kun paano mapatigayon ini nga mekanismo.
Ang amo nga kasugtanan ang nagbukas sang bag-o nga “channels for communication” sa tunga sang duha ka mga tiglawas nga idesignar sang mga lideres sang duha ka pungsod kag sa tunga sang Department of Foreign Affairs sa Manila kag Ministry of Foreign Affairs sa Beijing.
Ang mga pinuno sang duha ka Foreign Affairs ministries,ang ila deputy ministers, ukon designated representatives ang mahimo maggamit sang bag-o nga communications hotline.
Sa subong, ginabalay pa sang Chinese kag Philippine officials ang guidelines agud mapatuman ang maritime communications mechanism.
Nahibaluan nga ang masunod nga bilateral consultation ang iga- host sang China apang wala pa ini napetsahan.
