ILOILO CITY- Gintugutan sang Sandiganbayan ang prosecutors nga magpresentar sang dugang nga ebidensiya sa ginpasaka nga kaso nga graft kag technical malversation batok kanday anay Health Secretary Janette Garin kag 4 ka iban pa kaangot sa kontrobersyal nga pagbakal sang P3.5 bilyon nga balor sang Dengvaxia vaccine sang 2015.
Sa resolution nga gin-isyu sang Hulyo 15, ginpaboran sang anti-graft court ang mosyon nga gin-file sang prosecutors para ilakip ang mga ebidensiya nga indi parte sang rekord sa preliminary investigation sang mga kaso.
Ang mga ebidensiya nga ini amo ang Food and Drug Administration (FDA) Task Force Dengvaxia Report nga may petsa nga Marso 12, 2018, amo man ang 201 files gikan sa Department of Health (DOH) kag Food and Drug Administration (FDA) Human Resource Department.
Kalakip sa mga ginpasakaan sang paglapas sa Anti-Graft and Corrupt Practices Act magluwas kay Garin amo sanday Director Maria Joyce U. Ducusin, Undersecretary Gerardo Bayugo, former undersecretary Kenneth Y. Hartigan-Go, kag Philippine Children’s Medical Center (PCMC) Executive Director Julius Lecciones.
