Liwat nga ginduso sang Freedom from Debt Coalition (FDC) nga ipatuman ang wealth tax ukon ang pagsukot sang buwis sa mga manggaranon agud nga makatipon sang pondo ang gobyerno sa tunga sang nagapanglakaak sini nga utang.
Ginpaguwa sang grupo ini nga statement kasunod sang pag-anunsyo sang Bureau of Internal Revenue (BIR) nga ginpatuman na sini ang 1 percent creditable withholding tax sa online sellers.
Sa latest revenue memorandum circular ni BIR Commissioner Romeo Lumagui Jr., nakasaad nga ginamanduan ang electronic marketplace operators nga mag-impose sang withholding tax sa sellers kag merchants halin sang Hulyo 15, 2024.
Suno naman kay FDC Vice President Raquel Castillo, sang tion sang pandemya, ang online selling ang nakabulig sa mga tawo nga makasalbar man sa adlaw-adlaw nga kinahanglanon, gani mas maayo suno sa iya nga ang mga manggaranon ang lagson sang tax bureau ukon ang mga may ginatago nga financial flow.
“Nung nag-pandemic, ang dami sa atin na nagsubok na magbenta online. Nakahanap ng paraan para magcope ang mga tao tapos madadagok naman sila dito. Bakit hindi mo targetin yung mas mayayaman? Habulin ninyo yung mga tao na nagtatago ng financial flows?” pahayag ni Castillo.
Antes sini, matunog na ang panawagan sang grupo nga iimplementar ang wealth tax sa mga bilyonaryo ukon mga indibidwal nga nagalapaw na sa P300-million ang net worth.
Nahibaluan nga ang national debt sang Pilipinas ang nagsaka na sa P15.35 trillion sa katapusan sang Mayo.
Ginapasalig naman sang grupo nga magapakig-angot sila sa mga mamalidha nga handa nga mag-sponsor sa ila ginaduso nga hagna.
(Photo: Unbox Ph)
