Ginplastar sang chairman sang Senate Committee on National Defense, Security and Peace nga kinahanglan nga ipabilin ang relasyon sang Pilipinas sa kaiping nga mga nasyon kag iban pa nga kaalyado nga mga pungsod samtang nga padayon ang tensyon sa West Philippine Sea.
Sa interview sang Bombo Radyo kay Senator Jinggoy Estrada, iya ginpahayag nga kinahanglan gid nga tatapon ang mga kaapin sang Pilipinas pananglitan may dugang pa nga mga tikang nga himuon ang gobyerno sang China.
Suno kay Estrada, sulit-sulit na ang diplomatic protests nga nahimo sang Pilipinas apang daw kaangay nga nagapabungol-bungol ang China kag padayon sa pagpang-bully.
“As a chairman of the Committee on National Defense, all we have to do is.. well, file diplomatic protests. We have filed hundreds of diplomatic protests against China, but it fell in deaf ears,” pahayag sini sang nagkadto sa Iloilo City.
“We have to consolidate our allies, our neighboring allies most especially. Pati na ang allies natin abroad.. US, Australia, Japan, New Zealand,” dugang sini.
Makapilikon man suno sa natungdan nga sulit-sulit ang pagsulod sang Beijing sa exclusive economic zone sang Pilipinas.
Ang pinakaulihi nga natabo nga daku nga pagpang-harass amo ang nagluntad sang nagligad nga Hunyo 17 kun sa diin ginbanggaan sang China Coast Guard ang mga Pinoy sa Ayungin Shoal, ginbungguaan kag gingisian ang sakayan, ginkawat ang mga armas nga dal-on kuntani sa BRP Sierra Madre, kag sang ulihi, nautdan pa sang tudlo ang isa ka Philippine Navy personnel.
Gintawag ni President Ferdinand Marcos, Jr. nga “iligal” ang amo nga aktwasyon apang indi pa ini suno sa iya makabig nga isa ka armed attack.
Nahibaluan nga malapit na sa 143 ang note verbales nga napadala sang Pilipinas sa China halin sang nagpungko si President Marcos.#
