Nabutang sa mabudlay nga sitwasyon ang mga empleyado sang local government unit (LGU) sa Janiuay, Iloilo bangud sa atrasado nga sweldo kasunod sang pag-expire sang appointment sa ila nga officer-in-charge (OIC) treasurer.
Lakip sa wala maswelduhan amo ang alkalde sang banwa nga si Mayor Paulino “Paul” Parian pakadto sa iban nga mga posisyon kaangay sang job hires.
Sa interview sang Bombo Radyo kay Sangguniang Bayan Member James Ian Adelantar, iya ginpahayag nga nag-lapse ang appointment sang anay officer-in-charge treasurer nga si Emily Delos Santos sang nagligad pa nga Hulyo 2. Nagpungko ini sa pwesto sang nagligad nga tuig matapos nag-retiro ang ila former treasurer.
Bangud wala sang treasurer suno kay Adelantar, kaangay nga yara sa “default” mode ang banwa bangud indi man mahulag ang tanan nga pondo.
Magluwas nga wala sila sang sweldo, apektado man ang tanan nga operasyon bangud indi man pwede mahulag ang budget pati sa gasolina. Pananglitan may kalamidad nga matabo suno sa opisyal, wala man sang gamiton ang local government unit.
Kun amo sini ang sitwasyon suno sa natungdan, masami nga magalawig ini sang tatlo ka bulan apang nagalaum ang mga empleyado nga mapadasig ini agud maswelduhan na sila kag mabalik naman sa normal ang operasyon sang banwa.
