𝗠𝗔𝗡𝗜𝗟𝗔 — Handa ang Pilipinas nga makig-istorya sa Vietnam sa ila nga claim para sa isa ka extended continental seabed sa South China Sea nga mahimo mag-overlap sa ila mga teritoryo.
Suno sa Department of Foreign Affairs, samtang ginapamatud-an ang ila nga claim sa ginpasangkad nga continental shelf sa rehiyon sang Western Palawan region, handa ang ahensya nga makig-angot sa Vietnam sa posible nga mga paagi agud nga makabulig sa paghimo sang isa ka mapuslanon nga solusyon sa isyu sa South China Sea santo sa internasyonal nga kasuguan, ilabi na sa United Nations Convention on the Law of the Sea (UNCLOS).
Ang pagsumiter sang Vietnam ang gin-file kapin sa isa ka bulan matapos nga ginhingyo sang gobyerno sang Pilipinas ang UN Commission on the Limits of the Continental Shelf nga kilalahon ang iya ginpasangkad nga undersea shelf sa South China Sea, sa nakatundan nga probinsya sang Palawan, sa diin, ini ang may yara sang eksklusibo nga kinamatarong sa pagdumala agud nga i-explore ang mga manggad.
Ginpahayag man sang DFA nga ang lihok sang Manila, nga nagadumili sa China sa pag-angkon sa ginaagawan nga teritoryo nga bugana sa manggad ang nagasanto sa kinamatarong sa kadagatan sa idalom sang UNCLOS nga nakasaad man sa Extended Continental Shelf submission nga ginhimo sang Hunyo 15.
Apang, ang China ang nagapanindugan nga “indisputable” kag makasaysayan ang ila pag-angkon sa halos bug-os nga South China Sea, sa diin ang nagalumapaw nga mga pag-angkon ang nagtuga sang mga pag-inaway sa tunga sang pila ka pungsod.
Samtang, sang ang Manila ang nagdesisyon nga dal-on sa Netherlands arbitral tribunal kaangot sa claim sang China, gin-invalidate ang claim sang Beijing sang 2016, apang nagpamalibad ang China nga kilalahon ang desisyon.
Sa idalom sang UNCLOS, ang mga estado sa baybayon mahimo mag-angkon sang “Extended Continental Shelf” nga labaw sa 200-nautical mile outer limit sang ila eksklusibo nga ekonomiko nga sona ukon tubtob sa 350 nautical miles (648 kilometros).
Kasunod sang pagsumiter sang Manila, ginpahayag man sang Vietnam nga handa sila nga makig-istorya sa Pilipinas sa ila pag-claim, kag nagasiling nga ang isa ka mutual solution ang mapuslanon para sa duha ka pungsod.
Nahibaluan nga sang Abril 2009, ang Pilipinas naghimo sang partial submission sa Philippine Rise, nga gin-validate sang Commission on the Limits of the Continental Shelf (CLCS) sang 2012, nga nagresulta sa dugang nga 135,506 square kilometers sang seabed area para sa pungsod.
