𝗜𝗟𝗢𝗜𝗟𝗢 𝗖𝗜𝗧𝗬 — Nangin mainit ang sabtanay sa tunga ni Punong Barangay Arnel Asturias kag Police Lieutenant Ethan Estaya, head sang Iloilo City Police Office – Traffic Enforcement Unit.
Ini matapos natukiban nga sang Hunyo 18, 2024 nagpadulong ang enforcement team sang Iloilo City Police Office sa dalan sang Brgy. Loboc kag Mansaya, Lapuz, Iloilo City kon sa diin na-aktohan nga yara mismo ang pula nga container sang trailer truck nga naga-park.
Ini kasunod man sang kamatayon sang isa ka lalaki matapos nga nakabunggo ang iya nga motorsilklo sa amo nga nga trailer truck.
Ang biktima amo si Jessmark Gabral, 23-anyos, kag residente sang Brgy. Mansaya, Lapuz, Iloilo City.
Sa interview sang Bombo Radyo kay Asturias, iya ginkwestyon kon ngaa wala na-apprehend ang amo nga trailer truck kag wala gin-call out ang tag-iya sini sang natukiban nga iligal ini nga naga-park.
Suno kay Asturias, ngaa wala sang may ginhimo nga inisyatibo ukon lihok nga ginpatuman ang kapulisan kag sang may napatay na, amo sang sila ang nagkinaran-karan.
Ginpamangkot man sang natungdan kon ano ang ginhimo sang Traffic Enforcement Unit sa tyempo nga wala pa makuha ang amo nga container sang trailer truck.
Nagsabat naman si Police Lieutenant Ethan Estaya nga nagpatuman sila sang joint road clearing operation kaupod ang Iloilo City Traffic Management Unit (ICTMU) kag Public Safety and Transportation Management Office (PSTMO).
Kun balikan, sang Mayo 22, 2024, si Punong Barangay Pancho Vijuan sang Brgy. Loboc, Lapuz, ang nagsulat sa Public Safety and Transportation Management Office (PSTMO), Iloilo City Traffic Management Unit (ICTMU), kag Land Transportation Franchising and Regulatory Board (LTFRB) agud nga magpangayo sang assistance paagi sa road clearing sa dalan bangud madamo sang iligal nga naga-park sa amo nga lugar.
Ginbulgar man sang punong barangay nga masami nga makit-an sa lugar ang mga trailer truck ilabi na kon gab-i, kon sa diin, container na lang ang nabilin pagka-aga bangud nga nahadlok ang mga drivers nga madakpan sang otoridad.
Kun basehan naman ang Regulation Ordinance No. 2022-262, magabayad sang P5,000 nga penalidad ang magalapas, mahimo nga ma-preso pananglitan mapamatud-an nga guilty sang contempt court subong man solidary liable ang shipping companies kag truckers kun naglapas sa ano man nga probisyon sang ordinansa.
