Nag-withdraw sa kumpetisyon sa Paris Olympics ang 19-anyos nga team captain sang Japan women’s artistic gymnastics team nga si Shoko Miyata matapos nalapas sini ang code of conduct sang squad paagi sa iya pagpanigarilyo kag pag-inom sang makahulubog nga ilimnon.
Gin-anunsyo ini sang Japanese Gymnastics Association kun sa diin nakasaad man nga nakabalik na si Miyata sa Japan matapos nga nagbiya sa training camp sang team sa Monaco para magpaidalom sa imbestigasyon.
Bangud nakumpirma sa imbestigasyon nga na-violate sini ang ila pagsulundan, apat na lang sa baylo nga lima ang ipadala sang Japan sa gymnastics sa Summer Games.
Sunod man nga nagpangayo sang pasaylo si JGA President Tadashi Fujita samtang naga-atubang ini sa media kaupod ang personal coach ni Miyata nga si Mutsumi Harada.
Nahibaluan nga sa Paris Games kuntani ang tyansa sang Japan women’s gymnastics team nga makakuha sang team medal sa labing-una nga tion halin sang natabo ang 1964 Tokyo Olympics.
Ginrason sang coach ni Miyata nga naka-eksperyensya ang amo nga gymnast sang “extreme pressure” nga mag-perform sa “highest level” rason nga posible nahimo sini ang amo nga sala.
“She was spending her days really burdened with so much pressure,” pahayag sang coach samtang nagahibi. “I would implore people to understand that.”
Indi ini ang una nga bes nga matunog nga naistoryahan ang mental health kadungan sang Olympiada nga amo ang ginakabig nga pinakadaku nga entablado para sa mga atleta sa bilog nga kalibutan.
Sang 2021, sang ginpatigayon ang Olympics sa Tokyo, Japan, matandaan nga ang decorated American gymnast kag six-time Olympic medalist nga si Simone Biles ang nag-atras man sa women’s all-around final agud pasulabihon ang iya mental health.
Isa ang artistic gymnastics sa most popular sports sa Summer Games. Sa sini nga edition sang Olympiada sa Paris, France, magasugod ang hinampang sa Hulyo 27 kag magatakop sa Agusto 5.
