𝗜𝗟𝗢𝗜𝗟𝗢 𝗖𝗜𝗧𝗬 — Nakabaton sang proposal ang Iloilo City Council nga himuon carless ang adlaw sang Dominggo ang Calle Real, Iloilo City.
Sa interview sang Bombo Radyo kay Iloilo City Councilor Sedfrey Cabaluna, Chairman sang Commitee on Transportation, iya ginpahayag nga nagaplano ang excutive department nga ibalik ang anay ordinansa nga himuon nga commercial center ang calle real.
Suno kay Cabaluna, isa man ini ka rason nga may mga dalan nga kinahanglan nga siraduhon, nga nagtulod man sa konsehal nga tun-an ang mangin plastada sang trapiko.
Ginpahayag man sini nga kon madayon ang amo nga tikang, posible nga siraduhon ang mga dalan nga nagapalibot sa Calle Real, kaangay na lamang sang Mapa St. kag JM Basa St., Iloilo City Proper.
Ginalantaw man sang natungdan nga makaduha ka beses sa isa ka bulan nga siraduhon ang nasambit nga mga area.
Nahibaluan nga anay na nga nangin madinalag-on ang amo nga programa apang nagkaproblema sa sponsors kag financial component, rason man nga wala na ini na-maintain kag napadayon.
Plano naman sang konseho nga magtukod sang team agud makahimo sang mga lihok kaupod ang city planning kag city tourism agud nga maplanohan sang maayo kag malantaw ang mangin epekto sini sa ekonomiya kag traffic.
