𝗜𝗟𝗢𝗜𝗟𝗢 𝗖𝗜𝗧𝗬 — Nagalaum si Senator Bong Go nga mabatian sa State of the Nation Address (SONA) ang mga hinuman ni President Ferdinand Marcos, Jr. sa sektor sang ikaayong lawas, agrikultura, kag palangabuhian.
Sa interview sang Bombo Radyo kay Sen. Go, iya ginpahayag nga bilang chairman sang Senate Committee on Health, labing-importante para sa iya nga mabal-an ang kahimtangan sang pungsod sa pagpabaskog sang health care system.
Suno kay Go, nakibot ang tanan sa natabo nga pandemya, rason nga luyag sini mahibaluan ang mga tikang sang presidente agud hatagan sang solusyon ang problema sa ikaayong lawas.
Ginpahayag man sini nga luyag man niya mabatian ang mga plano sang administrasyon sa trabaho, agrikultura, sports, kag peace and order.
Gin-athag man sang senador nga tuyo sini mabal-an kon ano na ang mga natuman sang presidente sa iya nga mga ginpromisa sugod nga siya ang nagpungko bilang presidente.
Nagalaum naman ini nga matuman sang presidente ang mga ginbuy-an nga tinaga, kon sa diin, suportahan niya ini kon ang programa ang ‘Pro Poor’ ukon bentaha para sa mga pigado nga Filipino.
