Nagbyahe na padulong sa Paris, France ang delegasyon nga amo ang magatiglawas sang North Korea sa 2024 Olympic Games.
Masinadyahon ang North Korean athletes sang nagpa-picture ang mga ini sa airport sa Pyongyang samtang suksok ang puti nga blazers kun sa diin nakabutang ang ila nga national flag kag badge nga naga-feature sang ila anay mga lider.
16 ka atleta halin sa amo nga pungsod ang maga-compete sa pito ka Olympic events lakip na ang boxing kag table tennis.
Kaupod sang mga atleta ang North Korean culture and sports minister nga si Kim Il Guk.
Matandaan nga sang 2020 Olympics sa Japan, wala nagpadala sang delegasyon ang North Korea bangud sa kahangawa sa pandemya samtang sa 2022 Beijing Winter Olympics naman, gin-ban sila sa pagtambong.
Matandaan nga nakakuha ang North sang duha ka gold medals sa Rio Olympics sang 2016 nga amo ang katapusan nga tion nga nakapasakop ini sa Summer Games.
