𝗜𝗟𝗢𝗜𝗟𝗢 𝗖𝗜𝗧𝗬 — Plano nga imbestigaran sang Iloilo City Police Office (ICPO) ang natabo nga billiard tournament kahapon nga adlaw sa isa ka bilyaran sa Brgy. Bolilao, Mandurriao, Iloilo City.
Sa interview sang Bombo Radyo kay Police Captain Nonito Venteroso, Jr., Chief of Police sang Iloilo City Police Station 10, iya ginpahayag nga padalman sang ila katapo ang mga indibidwal nga matumod nga nagpusta sa amo nga hinampang ilabi na nga madamo sang tawo nga nakita sa video.
Suno kay Venteroso, gin-athag sang tag-iya sang bilyaran nga sa tunga sang duha ka naghampang nga sanday alyas Jaybee kag Buknoy, wala sang may nagpustahanay bangud ‘purely tournament’ lang ang ila hinampang.
Ginpahayag man sini nga antes paman natabo ang tournament sa bilyaran, may yara na sila sang ihibalo.
Nagmandu man ang natungdan sa kapulisan agud nga mag-roving sa lugar, kon sa diin, sa una nga tion, tawhay ang dalagan sang billiard tournament.
Sa subong, subject for validation ang ginapahayag nga P220 nga pot money sa hinampang, rason man nga kinahanglan pa nga imbestigaran.
Ginbuyagyag man ni Ventoroso nga may yara sang entrance fee nga ginsukot ang tag-iya sa mga tumalan-aw, apang, wala sini gintumod kon pila.
Gin-athag man sang hepe nga indi iligal nga magpanukot sang entrance fee ang tag-iya sang bilyaran bangud nag-agi sila sa insakto kag legal nga proseso agud nga maka-operate.
Nahibaluan nga ang billiard ang isa ka sports kag indi ini makabig nga isa ka gambling, apang, kon maaktohan mismo sang otoridad nga may pustahanay, posible ini nga i-raid sang mga kapulisan.
