Doble ang selebrasyon sang Filipina tennis star nga si Alex Eala bangud indi lamang isa kundi duha gid ang korona nga iya nakuha sa pagpasakop sini sa International Tennis Federation (ITF) W100 Vitoria-Gasteiz sa Espanya.
Nabulsa sang 19-anyos nga tennis sensation ang women’s singles title sa amo nga tournament wala gani 24 oras matapos man ini nagpangibabaw sa women’s doubles championship.
Nakuha sini ang titulo sa singles — ikalima na sa iya karera — matapos ginlutos ang Andorran standout nga si Victoria Jimenez Kasintseva sa women’s finals, 6-4, 6-4.
Antes nakaabot sa final match, ginpierde man sang Pinay si Yulia Starodubtsewa sang Ukraine sa quarterfinals, 7-6, 6-4, kag si Maria Jose Portillo Ramirez sang Mexico sa semifinals, 6-2, 6-1.
Ang doubles title naman — ikatatlo sa iya karera — ang nakuha ni Eala kaupod ang French partner sini nga si Estelle Cascino matapos gin-domina sanday Diana Marcinkevica sang Latvia kag Lia Karatantcheva sang Bulgaria sa Women’s Finals sang ila division, 6-3, 2-6, 10-4.
Antes ini nga doubles crown, nakadaog man si Eala sang doubles title sa Pune, India kaupod si Darja Semenistaja kag sa Croissy-Beaubourg, France kaupod man si Cascino.
