𝗜𝗟𝗢𝗜𝗟𝗢 𝗖𝗜𝗧𝗬 — Ginhatagan ni Iloilo City Mayor Jerry Treñas sang 9 out of 10 nga rating si President Ferdinand Marcos, Jr. sa iya nangin performance subong nga tuig.
Sa interview sang Bombo Radyo kay Treñas, iya ginpahayag nga naapresyar sini ang paglibot ni Marcos sa bug-os nga Pilipinas agud nga matuman ang mga nagkalain-lain nga proyekto.
Suno kay Treñas, makita sini nga nangin maayo ang performance ni Marcos bangud man sa nangin madinalag-on nga resulta sang pila ka proyekto sini.
Ginpahayag man sang alkalde nga naubra ni Marcos sang matalunsay ang iya katungdanan bilang presidente sang pungsod.
Nagpadala man ini sang mensahe kay First Lady Liza Araneta Marcos agud nga i-good luck si Marcos sa SONA sini subong nga adlaw.
Nagapati man ang natungdan nga ang kadalag-an sang presidente ang kadalag-an man sang bug-os nga pungsod.
Kon balikan, sang 2022 elections, hayag nga ginsuportahan ni Mayor Treñas si former Vice President Leni Robredo sa pagka-presidente sang pungsod.
