𝗜𝗟𝗢𝗜𝗟𝗢 𝗖𝗜𝗧𝗬 — Dako ang pagpasalamat ni Iloilo Governor Arthur Defensor, Jr. kay President Ferdinand Marcos, Jr. kasunod sang pagsambit sang presidente sang Jalaur River Multipurpose Project Phase 2 sa iya ika-tatlo nga State of the Nation Address (SONA).
Sa interview sang Bombo Radyo kay Governor Defensor, iya ginpahayag nga labing-importante ini para sa Iloilo bangud ginhatagan sang importansya sang president kag administrasyon ang mga proyekto nga mapuslan gid sang mga Ilonggo.
Suno kay Defensor, dako ang mangin bulig sang proyekto ilabi na sa mga Ilonggo nga mangunguma, rason man nga magakoordinar siya sa Department of Agriculture (DA) agud nga mangin mas bastante ang supply sang bugas sa probinsya.
Tinutuyo man sini nga makabulig sa food production sa bug-os nga Pilipinas paagi sa pagpasanyog sang Jalaur River Multipurpose Project Phase 2.
Pabor man ang gobernador sa nangin pahayag ni Marcos nga indi maayo kag wala sang benepisyo nga makuha ang pungsod sa Philippine Offshore Gaming Operators (POGO).
Apang, nag-ekspektar man ini nga masambitan sang president ang Panay-Guimaras-Negros Bridge.
Apisar sini, nagapabilin ang natungdan nga kampante nga mahuman ang proyekto bangud nasuguran na ang amo nga proyekto.
