𝗠𝗜𝗡𝗗𝗔𝗡𝗔𝗢 — Walo na ang mga napatay sa Mindanao bangud sang malain nga tyempo nga dala ni Bagyong Carina kag Butchoy.
Suno sa National Disaster Risk Reduction and Management Council (NDRRMC), sa pinakaulihi nga report sini, ginpahayag nga ang Tropical Cyclones Carina kag Butchoy, subong man ang Southwest Monsoon ukon Habagat ang nakaapekto sa nagkalain-lain nga bahin sang pungsod.
Pito ang kumpirmado nga napatay, lunsay sa Mindanao: apat sa Zamboanga kag tig-isa sa Northern Mindanao, Davao, kag Bangsamoro Autonomous Region sa Muslim Mindanao (BARMM).
Samtang ang isa pa ka ginreport nga napatay sa BARMM ang padayon pa gina-validate pa sang ahensya.
Ginpahayag man sang ahensya nga apat sa mga biktima ang napatay bangud sa trauma ukon suffocation by entrapment kasunod sang landslide incidents sa duha ka sitio sa Barangay Pamucutan, Zamboanga City.
Nasapwan naman kag nakuha sa Pulangi River sa Kabacan, North Cotabato, ang bangkay sang isa sa walo ka mga ginreport nga napatay nga taga-Maramag, Bukidnon,
Samtang, ginbawian naman sang kabuhi ang persona nga una na nga ginreport nga napilasan sa Jose Abad Santos, Davao Occidental matapos nga nagtabok sa suba samtang mabaskog ang daludo sang tubig.
Nahibaluan nga isa naman ang nagapabilin nga missing kag duha ang ginreport nga pilason sa Northern Mindanao bangud man sang malain nga panahon.
