Padayon pa nga gina-validate sang National Disaster Risk Reduction and Management Council (NDRRMC) ang reports sa numero sang nagkalamatay matapos nga nagtuga sang lapnagon nga baha kag landslides ang Habagat kag ang Bagyo Carina sa Pilipinas ilabi na sa National Capital Region.
Sa inisyal nga reports, may lima nga napatay sa Batangas kun sa diin apat diri ang mga miyembro sang isa ka pamilya nga nagakatulog gid sa sulod sang ila balay sang natiphagan sang duta sa banwa sang Agoncillo.
Isa naman amo ang 46-anos nga driver sang tricycle nga nakabunggo sa acacia sa banwa naman sang Nasugbo.
Sa Angeles City naman sa Central Luzon, ginapahayag nga duha man ka tawo ang napatay lakip ang isa ka menor de edad ang napatay bangud man sa landslide.
Apang kun basehan ang latest nga situational report sang ahensya, walo ang death toll dala na sang kumbinasyon sang Habagat, Bagyo Butchoy kag Bagyo Carina kun sa diin nalakip na diri ang na-rekord sa Zamboanga, tag-isa sa Northern Mindanao, Davao kag sa Bangsamoro Autonomous Region in Muslim Mindanao (BARMM).
Ginbuksan man mangin ang mga simbahan sa National Capital Region agud temporary nga matiniran sang mga residente bangud sa tuman ka taas nga pagsaka sang lebel sang tubig baha.
As of press time, nagdugang man sa nagdeklarar sang state of calamity ang 16 ka syudad kag isa ka munisipalidad sa Metro Manila; Cainta, Rizal; Cavite; Batangas; kag Baco, Oriental Mindoro.
Bangud sa sini nga deklarasyon, may yara sang awtomatiko nga pag-freeze sang presyo sang basic necessities kun sa diin ginamanduan man ang government financing ukon lending institutions nga magpasugot sa no-interest loans sa pinakaapektado nga mga indibidwal.
Una naman nga nagmandu si President Ferdinand Marcos, Jr. sa mga ahensya sang gobyerno nga magtutok gid kag magpakig-angot direkta sa local government units kag concerned agencies para sa pagbakwit sang mga pumuluyo nga apektado.
Yara naman sa P2.88-billion nga balor sang ayuda ang ginhanda sang national government para ihatag sa mga naapektuhan sa paglaslas sang bagyo.
