Nag-guwa sa report sang Philippine National Police (PNP) nga nagsaka na sa 21 ka mga tawo ang napatay sa Metro Manila, Calabarzon, kag Central Luzon bangud sa epekto sang Habagat nga ginpabaskog pa sang naglaslas nga Bagyo Carina.
Suno sa PNP, sa Calabarzon, 11 ka mga tawo ang ginbawian sang kabuhi bangud sa malain nga tiyempo lakip na ang lima sa Batangas kag tag-tatlo sa Cavite kag Rizal. Kalabanan sa sini nga mga biktima ang napatay bangud sa pagka-lumos, pagkatiphag sang duta, na-kuryente, kag natumbahan sang kahoy.
Sa pihak nga bahin, isa man ang missing sa Cavite samtang anum ang nasamaran sa Rizal as of posting time.
Sa Central Luzon, tatlo ang ginbawian sang kabuhi lakip ang duha sa Angeles City, Pampanga kag isa sa Bustos, Bulacan. Napatay sila bangud sa landslide kag drowning incidents suno sa PNP.
Sa amo nga rehiyon, tatlo ka mga tawo ang nasamaran.
Sa Metro Manila naman, pito ka mga tawo ang na-report nga patay bangud sa drowning kag electrocution samtang walo naman ang injured sa Quezon City.
Kun basehan naman ang report sang National Disaster Risk Reduction and Management Council (NDRRMC) kaina sang aga, yara lamang sa 14 ang fatalities bangud sa Habagat, Carina, kag Tropical Cyclone Butchoy.
Kaina sang aga sang ginkumpirma sang PAGASA nga nakaguwa na ang Carina sa Pilipinas apang magapadayon ang pag-ulan sa pungsod tubtub sa Sabado bangud sa epekto sang Southwest Monsoon.
