Ginkumpirma sang punong barangay sang Lopez Jaena Sur, La Paz, Iloilo City nga naga-proseso na kuntani agud nga mangin Filipino citizen ang isa ka Chinese national nga nadakpan sang otoridad nga nagabaligya sang smuggled nga mga sigarilyo.
Ini amo si James Chiu Chen, 59, nga naaresto sang nagligad nga adlaw sang 4th Special Operation Unit (SOU) Maritime Group bangud sa pagpanag-iya sang bodega nga may P4.8-million nga balor sang smuggled cigarettes.
Sa interview sang Bombo Radyo kay Punong Barangay Johnny Lego, iya ginpahayag nga sandig sa ila profiling, ini nga Chinese national ang duha ka tuig na nga nagapuyo sa Lopez Jaena Sur kag ginapahayag nga tatlo ka tuig sa Baldoza sa amo man nga distrito.
Ginapahayag nga may anak man ini nga isa na ka Filipino citizen kun sa diin diri nakapangalan ang ila house and lot nga nahamtang sa San Gregorio Subdivision.
Pahayag ni Lego, nakakadto anay sa iya ang Chinese national agud nga magpangayo sang barangay clearance apang gin-require man ini sang kapitan nga magkuha man sa Baldoza agud mapamatud-an nga nakatinir man ini sang tatlo ka tuig sa amo nga barangay.
Dugang sang opisyal, wala sila sang ihibalo nga involved sa smuggling ang amo nga tawo bangud ginpinsar nila nga ang negosyo sini amo lamang ang House and Decors sa JM Basa, St., City Proper.
Sa inisyal nga mga impormasyon, halin sa Manila ang mga sigarilyo nga ginapadala sang kilala sang amo nga Chinese national kag amo naman ang ginabaligya sini sa syudad.
