MANILA – Mahimo nga magpadayon sa pagbukas sang klase sa Hulyo 29, ang mga eskwelahan nga wala ukon may gamay lamang nga kahalitan bangud sang Bagyo Carina kag Southwest Monsoon (Habagat).
Suno kay Education Secretary Sonny Angara, maintindihan nga ang mga eskwelahan sa mga lugar nga apektado gid, ang kinahanglan nga ipaiway ang pagbukas sang school year.
Ginpahayag man sini nga ang iban nga mga eskwelahan kinahanglan gid nga ipaiway ang ila mga pagbukas bangod sang mga pagkay-o kag pagpanglimpyo nga dapat himuon, apang ang mga wala ukon may gamay nga kahalitan mahimo magpadayon sa pagbukas.
Gindugang pa sang hepe sang sa Department of Education (DepEd) nga sa subong nga adlaw, maga-issue siya sang listahan sang mga eskwelahan nga kinahanglan nga mag-delay sang ila class opening.
Gin-athag man sini nga indi pagpiliton ang mga eskwelahan nga naguba kag indi gid makapadayon sa pagbukas sang eskwelahan sa Lunes.
Sa pinakaulihi nga data sang sang sa Department of Education, may 90 ka mga eskwelahan sa siyam ka mga rehiyon (CAR, NCR, Region I, Region II, Region III, Region IV-A, Region IV-B, Region VI, kag Region VIII) ang nag-angkon sang kahalitan.
Nagalab-ot naman sa P630 million ang kabug-usan nga ginabanta nga gasto sa reconstruction kag rehabilitation.
Ginpahayag man sang report nga 324 ka mga eskwelahan sa anum ka rehiyon (CAR, NCR, Region I, Region III, Region IV-A, kag Region VI) ang ginagamit bilang evacuation center.
Pila ka mga lugar sa Pilipinas ang nagdeklarar man sang state of calamity bangud sang mabaskog nga pagbaha.
Magluwas sa Metro Manila, ang iban pa nga mga lugar nga nagdeklarar sang amo nga estado amo ang Bataan, Bulacan, Batangas, Cavite, Pinamalayan sa Oriental Mindoro, Kabacan kag Pikit sa Cotabato, kag Butuan sa Davao Occidental, kag iban pa.
Nahibaluan nga nakaguwa na sa Philippine Area of Responsibility ang Bagyo Carina nga naglab-ot sa super typhoon level sang Miyerkules, apang suno sa Philippine Atmospheric, Geophysical and Astronomical Services Administration (PAGASA) mahimo magdugay ang ulan tubtub subong nga adlaw sang Byernes.
